गेली बारा वर्षे म्हणजेच एक अखंड तप रुग्णांची सेवा करण्याचे काम रुग्ण हक्क परिषदेने केलेले आहे. सेवा म्हणजे सुश्रूषा नव्हे. हॉस्पिटलमध्ये दाखल झालेल्या रुग्णाला वैद्यकीय कर्मचारी आणि डॉक्टर मेहनतीने बरे करण्याचे काम करत असतातच मात्र या सगळ्यांमध्ये हॉस्पिटल आणि रुग्णाची एकाच गोष्टीमुळे कोंडी होते ती कोंडी म्हणजे आर्थिक कोंडी होय. या आर्थिक कोंडीमुळे भले भले लोक गलितगात्र होतात, हतबल होतात. जगण्याची इच्छा मंदावते. रोजच्या धकाधकीच्या जीवनात जगत असताना आजकाल कोणत्याही गोष्टीचा विश्वास राहिला नाही. कधीही काहीही घडू शकतं आणि त्यातून भयंकर मोठं आजारपण येऊ शकतं. अपघाती आजारपण हे भयंकरच मानलं पाहिजे. रस्ते अपघात, भाजून, बुडून, पडून होणारे अपघात आणि त्याच्या उपचारार्थ होणारी हॉस्पिटलची बिले आपण पाहिली तर तितक्या पैशांमध्ये मुंबई पुण्यात सहज घर विकत घेता येऊ शकेल असे त्यांचे आकडे झालेले आपल्याला दिसतात. अपघाताप्रमाणेच हृदयविकाराचा झटका किंवा तसेच अचानकपणे होणारे मेंदूंचे काही आजार बघितले तर सर्वसामान्य माणूस आजारापेक्षा त्यावर होणाऱ्या खर्चाच्या आकड्यानेच खचून जातो, अशी परिस्थिती सर्वत्र घडताना दिसते रोगापेक्षा जास्त पैशाचे डिप्रेशन येते. रोगराईच्या काळात शरीर अशक्त झालेले असताना उपचार करण्यासाठी पुरेसे पैसे नाहीत म्हणून मनसुद्धा अशक्त होत असते. अशा वेळी रुग्ण हक्क परिषद करीत असलेले काम पवित्र आणि पुण्याईचा संचय करणारे आहे. महाराष्ट्रात कॅन्सर रुग्णांची संख्या झपाट्याने वाढली आहे. महागड्या उपचारांमुळे अनेक कुटुंबे उद्ध्वस्त, कर्जबाजारी झाले आहेत. रुग्ण व त्यांच्या नातेवाईकांना दिलासा व आधार देण्यासाठी रुग्ण हक्क परिषदेच्या वतीने कॅन्सरमुक्त महाराष्ट्र अभियान हाती घेण्यात आले आणि कॅन्सरमुक्त महाराष्ट्र अभियानांत कॅन्सरवरील केमोथेरपी आणि ऑपरेशन शासकीय योजनांच्या माध्यमातून पूर्णपणे मोफत करण्यात येणार आहेत आणि 24/7 सेवा तुमच्यासाठी उपलब्ध आहे.